Flavonoidlar o‘simliklarning ikkilamchi metabolitlari bo‘lib, ularda kuchli antioksidant xossalar mavjud. Ular yallig‘lanishga qarshi, antibakterial, antivirus, allergiyaga qarshi, qon bosimini me’yorlashtiruvchi va immunitetni kuchaytiruvchi ta’sirga ega. Bugungi kunda flavonoidlar farmatsevtika, parhez ovqatlar, biologik faol qo‘shimchalar, kosmetologiya va oziq-ovqat sanoatida keng qo‘llanilmoqda. Ayniqsa, meva va sabzavotlarni sanoat yo‘li bilan qayta ishlashda hosil bo‘ladigan chiqindilar (masalan, anor, olma, uzum, apelsin, limon, sabzi, lavlagi, piyoz po‘stlog‘i va boshqalar) flavonoidlarning boy manbai hisoblanadi.