Sanoat inqilobi manufaktura sanoatidan mashinalashgan yirik industriya (fka, zd)ga oʻtish jarayonini ifodalovchi iqtisodiy va ijtimoiy-siyosiy oʻzgarishlar tizimi. Bu tushuncha 19-asrning 2-yarmida Arnold Toynbi tomonidan kiritilgan. Sanoat inqilobi jarayoni ishlab chiqarish mashinalarining ixtiro qilinishi va qoʻllanilishi bilan boshlandi, mashinalarni mashina tomonidan ishlab chiqarish, yaʼni mashina sanoati (ogʻir sanoat) paydo boʻlishi bilan yakunlandi. Sanoat inqilobi faqat texnikaviy emas, balki ijtimoiy-iqtisodiy burilishdir, chunki u kapitalistik munosabatlarning toʻla shakllanishiga olib keldi. Manufaktura mashina industriyasining paydo boʻlishi uchun shart-sharoit yaratib berdi. Sanoat inqilobi qator mamlakatlarda kapitalizmning sanoatdagi maʼlum rivojlanish bosqichini ifodalovchi umumtarixiy hodisa hisoblanadi, ammo manufakturadan yirik mashina industriyasiga oʻtish shart-sharoitlarining yetilishi jahon mamlakatlarida nihoyatda notekis kechgan.