Orol dengizi bir vaqtlar dunyodagi eng yirik ichki suv havzalaridan biri edi. Maydoni taxminan 68 ming kvadrat kilometr bo‘lib, hajmi bo‘yicha dunyoning to‘rtinchi yirik ko‘li sanalgan. Dengizga asosan Amudaryo va Sirdaryo daryolari quyilgan. Avvalgi davrlarda Orol dengizi atrofidagi iqlim yumshoqroq, baliqchilik, kemachilik va qirg‘oqdagi aholining turmushi juda boy bo‘lgan. U yerda yillik 40 ming tonnaga yaqin baliq ovlangan, o‘nlab baliqni qayta ishlash zavodlari faoliyat yuritgan.