Fargʻona vodiysi arxeologiyasi maktabining shakllanishi – oʻziga xos tarixiy jarayon boʻlib, bu davrda nafaqat mintaqaning arxeologik merosi oʻrganildi, balki mahalliy kadrlar tayyorlandi, maxsus tadqiqot yoʻnalishlari shakllantirildi va zamonaviy uslublar qoʻllanildi. Bugungi kunda Fargʻona vodiysi arxeologiyasi maktabi mintaqa va Oʻrta Osiyo arxeologiyasi rivojida muhim rol oʻynamoqda va bu sohadagi yangi kashfiyotlar va ilmiy izlanishlar bilan oʻzining salohiyatini namoyon qilmoqda. Farg‘ona vodiysi hududida olib borilgan arxeologik tadqiqotlarning ba’zilari to‘g‘risida to‘xtalib o‘tar ekanmiz, uning mustaqillik davri ilk yillaridagi holati yuzasidan ayrim qirralarni ochib berishga harakat qildik. Bir maqolada bu mavzuni to‘laqonli tarzda tahlil qilish imkoni yo‘q. Shu jihatdan bu boradagi izlanishlarni davom ettirgan holda keyingi tadqiqotlarda ilmiy asoslangan yangi xuloslar chiqarishga harakat qilamiz. Kichikroq ko‘lamdagi tadqiqotimiz mustaqillikning dastlabki yillarida Farg‘ona vodiysi hududidagi arxeologik tadqiqotlarni amalga oshirishda iqtisodiy qiyinchiliklar yuzaga kelganini ko‘rsatmoqda. Lekin soha mutaxassislari va fan rivojini qo‘llab-quvvatlovchilar arxeologiya tadqiqotlari rivojlanishiga harakat qilishgan.