Tikuvchilik vositalari, material va texnikasi turli davrlarda turli xalqlarning moddiy va madaniy saviyasi, iqlim sharoiti, ehtiyoj va imkoniyatlari, urf-odatlari zaminida taraqqiy etgan. Arxeologik qazishlar natijasida jaxonning turli mamlakatlari hududidan topilgan tikuvchilik vositalari, kiyim-kechak va uy-ro‘zg‘or buyumlari bu kasbning barcha xalqlarda qadimdan mavjudligi, o‘ziga xos taraqqiyot bosqichlarini o‘taganligini ko‘rsatadi. Tikuvchilik buyumlari dehqonchilik bilan shug‘ullanadigan xalqlarda ko‘proq o‘simlik tolalaridan to‘qilgan gazlamalardan, chorvador xalqlarda aksariyat jun gazlama va teridan tikilgan.