Yozma nutqning to’g’rilik sifati ta’minlanishi uchun yana ikki turli me’yorga amal qilinishi zarur. Bu me’yorlar quyidagilardan iborat: 1) imlo (orfografik) me’yorlari; 2) tinish belgilari (punktuatsion) me’yorlari. Imlo me’yorlari mutaxassislar tomonidan til qonuniyatlari, shuningdek, tarixiy an’analarga suyangan holda aniq qoidalar shaklida tayyorlanadi va tegishli davlat organi tomonidan tasdiqlanadi. Tinish belgilari yozuvning harflar, raqamlar kabi boshqa vositalari hamda so’zlar, morfemalar kabi til birliklari bilan ko’rsatish mumkin bo’lmagan turlicha fikriy munosabatlarni, psixologik va intonatsion holatlarni ifodalashda muhim o’rin tutadi.