Oilada dastlabki beriladigan ma'naviy-axloqiy tarbiya (Оилада дастлабки бериладиган маънавий-ахлоқий тарбия) Reja: 1. Yosh avlodni tarbiyalashda oilaning o'rni. 2. O‘zbekiston Respublikasi Konstitutsiyasida oila bobi. 3. Oilada bola hayotini va tarbiyasinii oqilona tashkil etish. 4. Oilada bolaning ma’naviy-axloqiy tarbiyasi. 5. Xulosa. Farzand tarbiyasi – har bir oila uchun muqaddas burch. O‘zbek oilalarida esa mehnatsevarlik, odob-ahloq va milliy an’analar avloddan-avlodga o‘tib, bolalarga hayot saboqlari berishda muhim omil bo‘lib kelgan. Xalqimizning azaliy mehmondo‘stlik an’anasi ham zamon talablari bilan uyg‘unlashib, ijtimoiy hayotimizda yangi mazmun kasb etmoqda. Har tomonlama yetuk shaxsni tarbiyalash oson emas. Ayniqsa, bugungi kunda yosh avlodni nafaqat bilimli, balki jismonan sog‘lom, axloqan pok, ma’naviy boy inson qilib tarbiyalash dolzarb masalaga aylangan. Bu esa jamiyat taraqqiyoti va zamonaviy turmush talablarining tabiiy natijasidir. Inson qadri va uning baxt-saodati eng muhim masalalardan biri ekani kech bo‘lsa ham chuqur anglanmoqda. Milliy urf-odat va qadriyatlarimiz yana tiklanib, yosh avlodga bebaho meros bo‘lib qolmoqda. Bu esa kelajak avlod uchun ulkan boylik va buyuk baxtdir. … O‘zbek milliy urf-odatlariga ko‘ra, bola xulqi va tabiati ko‘pincha ota-onasining fazilatlari bilan bog‘liq holda baholanadi. Xalqimizda “Qush uyasida ko‘rganini qiladi” degan hikmatli so‘z ham bejiz aytilmagan. Bu shuni anglatadiki, farzand tarbiyasida ota-onaning shaxsiy namuna ko‘rsatishi muhim o‘rin tutadi. Odamlar bolaga baho berayotganda, uning ota-onasiga xos xususiyatlarni ko‘radi va “ha, ota-onasiga tortibdi” deb ta’riflashadi. Yaxshi yoki yomon xulqning shakllanishi avvalo ota-onaning o‘zidan boshlanadi. Bolalar o‘z hayot yo‘lini belgilab borayotganida, ular atrof-muhitdan ko‘ra ko‘proq ota-onaning xatti-harakatlarini kuzatib, o‘rnak oladilar. Shu sababli, har bir ota-ona farzandining bolalikdan ezgu fazilatlarni o‘zlashtirishi uchun unga yaxshi namuna bo‘lishi lozim. Agar bolaga ibratli tarbiya berilsa, u ulg‘ayganida oriyatli, nomusli, o‘z burchini his qiladigan, odobli va xushmuomala inson bo‘lib yetishadi. Shuningdek, bunday inson bemorlarga mehribon, insonlarga nisbatan g‘amxo‘r va samimiy bo‘lib, jamiyatga foydali shaxsga aylanadi. Shu bois, ota-onaning o‘z farzandlariga yoshlikdan boshlab yaxshi fazilatlarni singdirishi kelajak uchun bebaho sarmoyadir. Inson bolalik davridan voyaga yetguniga qadar ota-onasi yoki uning o‘rnini bosuvchi shaxsning tarbiyasida bo‘ladi. Bu davrda bola hayotiy tajriba orttiradi, axloqiy qadriyatlarni o‘zlashtiradi va o‘z shaxsiyati shakllanadi. Nihoyat, voyaga yetgach, u mustaqil hayot kechirishni boshlaydi va o‘z oilasini quradi. Har bir inson, qaysi oilada bo‘lishidan qat’i nazar, unga sadoqatli bo‘lishi zarur. Oila – insonning eng muqaddas dargohi bo‘lib, unga sadoqat bilan yashash nafaqat burch, balki yuksak axloqiy fazilatdir. Ayniqsa, oila a’zolarining o‘z xonadoniga bo‘lgan sodiqligi mustahkam bo‘lishi bilan birga, ular o‘z oilasining sha’ni va obro‘sini himoya qilishga ham harakat qilishi kerak. Oilaning or-nomusi va obro‘sini saqlash har bir a’zoning vazifasidir. Oilaviy qadriyatlarni hurmat qilish, unga mehr bilan munosabatda bo‘lish va uni yanada mustahkamlash orqali inson o‘zining jamiyatdagi o‘rnini mustahkamlab boradi. Chunki mustahkam va baxtiyor oilalar jamiyatning asosi bo‘lib, ularning barqarorligi yurt taraqqiyotiga ham bevosita ta’sir ko‘rsatadi. …