O‘zbek formal-funksional sintaksisida sodda gap lisoniy-sintaktik qurilish qolipi aniqlanib, uning asosiy ko‘rinishlari belgilangan bo‘lsa ham, sodda gaplarning qurilish qoliplari paradigmalari ajratilmagan. Shu bilan birga, kesimlik shakllarining sodda gaplarning lisoniy-sintaktik qurilishiga ta'siri va sodda gap qurilish qoliplarini belgilashi masalasi alohida tadqiq etilmagan. Sodda gap sintaksisini formal-funksional nuqtayi nazardan talqin etgan ilmiy, o‘quv-usuliy adabiyotlarda sodda gaplarning lisoniy qurilishi, ularning eng kichik qurilish qolipi to‘g‘risida ma'lumot berilgan bo‘lsa ham, sodda gaplarning lisoniy qurilishini tizim qonuniyati asosida tadqiq etish zaruratini tug‘diradi. Bu esa sodda gap umumiy lisoniy-sintaktik qurilish qolipi va variantlarini ushbu qolip umumiy va xususiy shakllarini belgilashda kesimlik kategoriyasi shakllarining vazifasini, ayni choqda, sodda gap lisoniy-sintaktik qurilishiga kesimlik shakllarining ta'sirini tahlil etish orqali o‘rganish imkoniyatini beradi. Shunday ekan, mazkur masalani tadqiq etish zarurati va mavjud imkoniyat malakaviybitiruv ishining shakllanishi uchun yetarlicha asos bo‘la oladi.