Kristallanish Reja: 1. Umumiy tushunchalar. 2. Kristallanish paytidagi muvozanat. 3. Kristallanish jarayonining tezligi. 4. Kristallizatorlarning tuzilishi. 8.1. UMUMIY TUSHUNCHALAR Eritma, erigan qotishma va gaz fazasi tarkibidan kristallar holatidagi qattiq fazani hosil qilish jarayoni kristallanish deb ataladi. Ushbu jarayon sanoatning neft va gazni qayta ishlash, kimyo, metallurgiya, oziq-ovqat, dori-darmon ishlab chiqarish kabi tarmoqlarida ishlatiladi. Kristallanish jarayonlari yordamida quyidagi vazifalar hal qilinadi: - zarrachalarning to’plami, granula, tangacha va boshqa shakldagi qattiq mahsulotlarni olish; - turli aralashmalarni fraksiyalarga ajratib, ularni birorta komponent bilan boyitish; - texnik yoki tabiiy eritmalardan turli moddalarni ajratib olish; - moddalarni aralashmalardan chuqur tozalash; - suyultirilgan eritmalarni erituvchini muzlatish orqali quyiqlashtirish; - ma’lum fizik-mexanik xossalarga ega bo’lgan moddalarni olish; - qattiq jismlar yuzasiga turli qoplamalarni surtish va hokazo. Kristallanish jarayonini amalga oshirishda turli-tuman uslublardan foydalaniladi. Ularni asosan besh guruhga bo’lish mumkin: erigan qotishmalardan kristallar hosil qilish; eritmalardan kristallar hosil qilish; bug’ yoki gaz fazasidan kristallar hosil qilish; qattiq holatdagi kristallanish; moddalarning o’zaro kimyoviy ta’siri paytida kristallar hosil qilish.