To’lqinlar bilan tanishishni kundalik turmushda ko’p kuzatgan hodisadan boshlanglik. Suvga biror jism tashlasak, uning sirti bo’ylab to’lqinlar tarqaladi. To’lqinlar navbatlashgan aylanasimon do’ngliklar va chuqurliklardan iborat. Suv sirtining biror manzarasiga e’tibor bersak, undagi aylanasimon do’ngliklar va chuqurliklarning markazi tosh tushgan O nuqta ekanligini aniqlaymiz. To’lqinning tarqalish jarayonini kuzatsangiz, do’nglik va chuqurlik aylanalarning radiuslari kattalashib boraveradi. Ko’chmaydigan suv zarralari o’zlarining muvozanat vaziyatlari atrofida tebranma harakat qiladilar. To’lqinni hosil qilish uchun manba bo’lishi lozim, bu manba o’zi joylashgan sohadagi muhit zarralarini tebratadi. To’lqin sirtida yuzaga keladigan to’lqinlarda sirtning qo’shni elementlari orasidagi o’zaro bog’lanish sirt taranglik va og’irlik kuchlari tufayli amalga oshadi. Elastik muhitda zarralar orasidagi o’zaro bog’lanish kuchlari elastik xarakterga ega.