Avtomobil va traktor dvigatellarida ishchi aralashmaning yonishi natijasida issiqlik energiyasi ajralib chiqib mexanik ishga aylanadi. Ushbu jarayon benzinli dvigatellar uchun ham, dizellar uchun ham bir xil vazifani bajaradi, lekin benzinli dvigatellar bilan dizellarda sodir boʻladigan bu jarayonlar bir-biridan farq qiladi. Yonish jarayonlariga ta’sir etuvchi omillar ham turli xususiyatlarga ega boʻladi. Benzin va gazda ishlaydigan dvigatellarda yonish jarayoni barqaror oʻtishi uchun 𝛼=0,7-1,2 oraligʻida boʻlishi kerak. Havoning ortiqlik koeffitsiyenti 𝛼 yuqoridagi miqdordan oshib ketsa, yoki kamaysa, ishchi aralashmaning yonish tezligi keskin kamayib ketadi. Uglevodorodli yonilgʻilarda 𝛼=0,85-0,9 boʻlganda alanganing tarqalish tezligi eng yuqori qiymatga ega boʻladi. Ushbu chegaralarda dvigatelda yonish jarayoni barqaror holda sodir boʻladi.